Header Navigation

Monday, April 25, 2016

కోహ్లి 'శత' క్కొట్టినా...

బౌలర్ల సహకారం లేకపోవడంతో... భారీస్కోర్లు చేస్తున్నా రాయల్ చాలెంజర్స్ బెంగళూరు జట్టును మూడోసారి పరాజయం పలుకరించింది. కెప్టెన్ విరాట్ కోహ్లి తొలిసారి టి20లో సెంచరీ సాధించినా బౌలర్ల వైఫల్యంతో ఆ జట్టుకు ఓటమి తప్పలేదు. మరోవైపు గుజరాత్ లయన్స్ ఛేదనలో గర్జిస్తోంది. బెంగళూరు తమ ముందుంచిన కొండంత లక్ష్యాన్ని అలవోకగా అధిగమించింది. లయన్స్ ఆడిన ఐదు మ్యాచ్‌ల్లో నాలుగు మ్యాచ్‌ల్ని ఛేదించే గెలిచింది. ఒక్క మ్యాచ్‌లో ముందుగా బ్యాటింగ్ చేసి ఓడింది.

రాజ్‌కోట్: ఈ ఐపీఎల్ సీజన్‌లో బౌలింగ్ సమస్య బెంగళూరు జట్టు కొంపముంచుతోంది. విరాట్ కోహ్లి మెరుపు శతకంతో భారీస్కోరు చేసినా ఆ జట్టును ఓటమి వీడలేదు. ఈ సీజన్‌లోనే కొత్తగా అడుగుపెట్టిన గుజరాత్ లయన్స్ విజయాలతో దూసుకెళ్తోంది. బ్యాట్స్‌మెన్ సమష్టి కృషితో రాణించడంతో భారీ లక్ష్యాన్ని సునాయాసంగా ఛేదించింది. ఆదివారం సౌరాష్ట్ర క్రికెట్ సంఘం స్టేడియంలో జరిగిన మ్యాచ్‌లో గుజరాత్ 6 వికెట్ల తేడాతో బెంగళూరు రాయల్ చాలెంజర్స్‌పై జయభేరి మోగించింది. మొదట బెంగళూరు 20 ఓవర్లలో 2 వికెట్లకు 180 పరుగులు చేసింది. సూపర్ ఫామ్‌లో ఉన్న విరాట్ కోహ్లి (63 బంతుల్లో 100 నాటౌట్; 11 ఫోర్లు, 1 సిక్స్) సెంచరీ సాధించాడు. లోకేశ్ రాహుల్ (35 బంతుల్లో 51 నాటౌట్; 4 ఫోర్లు, 3 సిక్సర్లు) ఆకట్టుకున్నాడు. తర్వాత లయన్స్ 19.3 ఓవర్లలో 4 వికెట్లు కోల్పోయి 182 పరుగులు చేసి గెలిచింది. దినేశ్ కార్తీక్ (39 బంతుల్లో 50 నాటౌట్; 3 ఫోర్లు), మెకల్లమ్ (24 బంతుల్లో 42; 5 ఫోర్లు, 2 సిక్సర్లు) చెలరేగి గుజరాత్ విజయంలో కీలకపాత్ర పోషించారు.

Read For More News: visit Sakshi Online ePaper